Sot në orën 17:00 të gjitha rrugët në qytetin juglindor të çojnë në stadiumin “Skënderbeu”, teksa Skënderbeu luan ndeshjen më të rëndësishme në këto 6 javë të para. Kjo pasi bardhekuqtë do të luajnë për tre pikë, si alternativë e vetme, pas 1 fitoreje, 1 barazimi dhe 3 humbjeve.

Përballë është Laçi, skuadër që në fakt edhe ajo nga ana e vet do të kërkojë trepikëshin e parë, por që kurbinasit e dinë fort mirë që sot nuk e kanë të lehtë.

Skënderbeu i mbushur tashmë me lojtarë, pritet që sot ta kalojë edhe gjendjen psikologjike që nuk është e duhura, por që drejtuesit janë përpjekur të ngrenë moralin e lojtarëve gjatë këtyre ditëve.

Forma e të gjithë futbollistëve është e duhura e tashmë pritet që ngërçi i rezultateve pozitive të kapërcehet ditën e sotme me një fitore të mundshme të Skënderbeut.

Pritet që sot të mos mungojë as përkrahja e tifozëve në shkallët e stadiumit, që sigurisht janë lojtari i 12-të.

Nga ana tjetër edhe vetë lojtarët jashtë deklaratave për mediat theksojnë se erdhi momenti i kthesës dhe sot në orën 17:00 Skënderbeu ka vetëm një rrugë, fitoren.

REDAKTUAR nga:

“KORÇA BOOM”

Ndërkohë që janë aluduar shumë emra lojtarësh apo ndryshime në formacionin e Skënderbeut në përballjen e sotme ndaj kurbinasve, është portali ynë “Korça Boom” që zbulon formacionin e Skënderbeut që do të zbresë nga minuta e parë sot në përballjen ndaj Laçit.

Në portë nga minuta e parë do të jetë Marko Alia.

Në repartin e mbrojtjes sot do të kemi Andrea Gerco dhe Kosta Vangjeli nga krahët, ndërkohë që në qendër kapiteni Elvis Prençi dhe Luko Vaskes, teksa Marko Ramos do ta nisë nga stolid dhe gati do të jetë edhe Randi Dumfor.

Në mesin e fushës, treshja do të fillojë me Mario Rabiun, lojtar që do të luajë përpara mbrojtjes, në vendin e tij në rolin e shkatërruesit. Pranë njëri-tjetrit në mesin e fushës do të jenë Dejvid Janaqi dhe Juri Merlim, që do të jenë ata që do të shërbejnë për vijën e parë.

Në sulm Skënderbeu sërish do të jetë me tre futbollistë. Ermir Rashica dhe Ardit Nikaj nga krahët kanë në qendër Bismark.

Kjo është 11-shja që e kemi zbuluar në këto momente dhe duket se është kopje e ndeshjes së fundit ndaj Dinamos, teksa Ivan Gvozdenoviç u beson këtyre lojtarëve që ka në formë për momentin.

Në stol sot do të shohim emra të tillë, si: Roku, Doka, Randi, Ramos, Shaqe, Tayo, Zenullari, Franklin, Krasniqi, Xhixho, Tare.

REDAKTUAR nga:

“KORÇA BOOM”

“Unë në orën 17:00 do të jem në stadiumin “Skënderbeu”, eja edhe ti!”

Kjo është fjalia që po qarkullon në rrjetet socile nga tifozët korçarë, të cilët ftojnë njëri-tjetrin për të mbështetur ekipin.

Është sot një prej atyre ndeshjeve që më tepër se kurrë kërkon prezencë dhe njëkohësisht mbështetje. Ekipi i Skënderbeut luan shanset e mëdha për të bërë një hap para në renditje dhe vetëm tre pikët janë shpëtim.

Futbollistët dhe stafi pritet të bëjnë më të mirën, madje edhe me tej se maksimalja.

Është momenti që të gjithë të jenë bashkë, për të marrë këto tre pikë dhe më pas për të parë me optimizëm edhe ngjitjen në tabelë. Sot në orën 17:00, në stadiumin e Korçës ndeshja Skënderbeu- Laçi.

REDAKTUAR nga:

“KORÇA BOOM”

Trajneri Ivan Gvozdenoviç në konferencën e tij para ndeshjes ka deklaruar: “Do të presim edhe stërvitjen e fundit dhe do të vendosim për formacionin.”

Duke ndjekur stërvitjen e djeshme, pra, të fundit para ndeshjes me Laçin u pa qartë se do të kishte një ndryshim në formacion dhe kjo do të ishte tek reparti i mbrojtjes.

Kështu si Vaskes ashtu Ramos do të jenë në stol dhe është pikërisht Randi ai që i ka ulur të dy këta futbollistë në stol. Kështu Gvozdenoviç do të rikthejë menjëherë në formacion futbollistin e sapo mbërritur, kjo për atë se ka parë një gjendje shumë të mirë fizike.

Me sigurinë që të jep në lojë, ai është një pikë që mund të bëjë edhe eleminimin e gabimeve individuale të mbrojtjes.

REDAKTUAR nga:

“KORÇA BOOM”

Gara e nesërme në Singapor është gara e 18-të e sezonit të Formula 1 dhe pritet të sjellë shumë emocion për tifozët. Një nga veçantitë e kësaj gare është se ajo zhvillohet gjatë natës, nën dritën e projektorëve, duke krijuar një atmosferë unike dhe spektakolare.

Me disa pilotë në garë për titullin e kampionit të botës, presioni është i madh. Kualifikueset do të zhvillohen sot në orën 15:00 sipas orës së Shqipërisë, që përkon me orën europiane, ndërsa në Singapor, ora do të jetë 21:00. Gara në këtë pistë gjithmonë është e vështirë, pasi kushtet klimaterike, si lagështia e lartë dhe rrugët e ngushta, krijojnë sfida shtesë për pilotët.

Spektatorët presin performanca të shkëlqyera, ndërsa tensioni rritet për garën që do të vendosë shumë në luftën për titullin e kampionit të botës.

REDAKTUAR nga:

“KORÇA BOOM”

Kategoria e Parë hap sot javën e 5-të të kampionatit me 4 sfida shumë interesante që do të luhen paralelisht në orën 16:00. Në përballjet e sotme spikat ajo mes Lushnjes dhe Besës që do të duelojnë në stadiumin ‘Roza Haxhiu’ për objektivin e vetëm, 3 pikët.

Lagunarët vijnë me moralin lart pas fitores në derbin ndaj Apolonisë dhe pritet që sot të kenë një ndihmë të madhe edhe nga tifozët lushnjar. Nga ana tjetër kavajasit duken të pandalshëm këtë start sezoni duke fituar të gjitha sfidat e tyre.

Ndeshje e luftuar pritet edhe në Dibër, ku Vora do të sfidojë Korabin në transfertë. Kastrioti – Burreli dhe Pogradeci – Erzeni janë dy sfidat e tjera të ditës së sotme

REDAKTUAR nga:

“KORÇA BOOM”

Kombëtarja shqiptare U-15 nis sot përgatitjet për dy ndeshjet miqësore me Malin e Zi U-15, që do të luhen më 24 dhe 26 shtator. Trajneri Armand Dama ka shpallur listën me emrat e 20 lojtarëve të ftuar për këto dy sfida.

Ndeshja e parë miqësore Shqipëri U-15 – Mal i Zi U-15 do të zhvillohet më 24 shtator në Podgoricë dhe do të nisë në ora 16:00. Ndërsa ndeshja e dytë mes këtyre skuadrave do të luhet më 26 shtator dhe e do të luhet në fushën sportive “Reshit Rusi” dhe do të nisë në ora 16:00.

Shumë nga lojtarët e ftuar e konkretisht 17 të tillë, aktivizohen në kampionatin shqiptar. Këta futbollistë janë evidentuar jo vetëm në ndeshjet që luajnë me skuadrat e tyre, por edhe nga projekti i FSHF-së, “Step by Step”, ku futbollistët e vegjël që luajnë në Shqipëri grumbullohen dhe stërviten në “Shtëpinë e Futbollit” nën urdhrat e trajnerëve të ekipeve zinxhir të moshave. Sakaq, tre lojtarët e tjerë kuqezi vijnë nga akademitë e Lazios, Interit dhe Panathinaikos.

Nën drejtimin e trajnerit Dama dhe stafit të tij, kuqezinjtë e vegjël do të grumbullohen në Velipojë dhe do të zhvillojnë pasditen e sotme seancën e parë stërvitore me lojtarët e ftuar. Grumbullimi do të zgjasë 6 ditë dhe grupi do të ketë kohën e nevojshme për t’u njohur më mirë me njëri-tjetrin.

Këto dy teste miqësore janë një mundësi shumë e mirë për trajnerin Armand Dama dhe stafin teknik të Kombëtares U-15 për të testuar e vëzhguar nga afër lojtarët e grumbulluar.

REDAKTUAR nga:

“KORÇA BOOM”

Java e 6-të e superligës erdhi. Kjo pasi nesër dhe pasnesër luhen 5 çiftet e kësaj jave që pritet të dhurojë emocone të mëdha për shkak se superliga është future në faza interesante. Madje do të jetë Skënderbeu që do të luajë nesër ndeshjen e parë të kësaj jave, pra qysh të shtunën.

Skënderbeu-Laçi do të luhet më 21 shtator (nesër) dhe do të startojë ndryshe nga herët e tjera, në orën 17:00. Dita e parë, pra e shtuna do të mbyllet me derbin e kryeqytetit, Partizani-Tirana, takim që do të startojë në orën 20:00 të mbrëmjes dhe do të jetë kryendeshja e kësaj jave.

Më pas radha do të jetë të dielën, ku do të luhen jo pak, por 3 ndeshjet e mbetura. Vllaznia-Bylis do të jetë ndeshja e parë e së dielës në orën 17:00, ndërkohë që dy takimet e fundit do të startojnë në orën 20:00 të mbrëmjes. Elbasani-Egnatia dhe Teuta-Dinamo do të mbyllin këtë javë të 6-të dhe të gjitha duelet priten me interes të madh.

JAVA E GJASHTË E SUPERLIGËS

NESËR 21 SHTATOR 2024 

ORA 17:00 SKËNDERBEU-LAÇI

ORA 20:00 PARTIZANI-TIRANA

E DIELË 22 SHTATOR 2024 

ORA 17:00 VLLAZNIA-BYLIS

ORA 20:00 ELBASANI-EGNATIA

ORA 20:00 TEUTA-DINAMO

REDAKTUAR nga:

“KORÇA BOOM”

Përfunduan seleksionimet për ekipet përfaqësuese rajonale Qarku Korçë për datëlindjet 2012-të dhe 2013-të.

Diten e mërkurë datë 18. 09. 2024 drejtoria teknike (sektori i ekipeve kombëtare në FSHF) në bashkëpunim me Shoqatën Rajonale të Futbollit Korçë organizuan në aneksin e stadiumit “Skënderbeu” përzgjedhjen e ekipeve përfaqësuese rajonale të rajonit Korçë për datëlindjet 2012-2013.

Seleksionimi  u bë ditën e mërkurë në orën 10:00.

Suksese të gjithë futbollistëve të vegjël!

REDAKTUAR nga:

“KORÇA BOOM”

Dita e ndeshjes mes Skënderbeut dhe Laçit thuajse erdhi. Themi këtë pasi nesër, as 24 orë më vonë, në orën 17:00, Skënderbeu luan përballë kurbinasve në stadiumin “Skënderbeu” në ndeshjen e vlefshme për javën e gjashtë.

Në 5 javë të luajtura deri tani Skënderbeu ka 1 fitore, 1 barazim dhe 3 humbje, ndërkohë që nesër është dita e së vërtetës, pasi Skënderbeut i bën punë vetëm fitorja.

Përballë është Laçi, ekip jo fort i lehtë për t’u mundur, por që gjithsesi Skënderbeu ka vetëm objektivin 3-pikësh dhe këtë e dinë mirë që nga lojtarët dhe deri te stafi teknik.

Skënderbeu duhet pranuar që është nën presion për mungesë pikësh, por që kjo do të dihet të administrohet nesër në fushën e lojës.

Kujtojmë që bardhekuqtë në shtëpi në ndeshjen e fundit ndaj Teutës e humbën dhe duke shtuar edhe humbjen e fundit me Dinamon, nuk mund të pranojnë një disfatë të tretë. Të gjitha alternativat të çojnë te fitorja dhe Skënderbeu është gati ta bëjë realitet këtë në fushën e lojës.

Djemtë e Skënderbeut nesër kanë nevojë vetëm për mbështetjen e tifozërisë që sigurisht nuk do të mungojë dhe në fushë pritet kthesa e madhe.

Nëse ka një ditë të vërtetë, është nesër, prandaj: Forca Skënderbe! Nesër është dita juaj!

REDAKTUAR nga:

“KORÇA BOOM”